قال لي: (ياخي اكتب عن المسكوت عنه في الهلال.. الهلال ده فيهو ظلم مافي زول ابدا بتكلم عنو.. والانصاف بس بكون من باب الحب.. والكراهية.. والما عندو ضهر في الهلال ده بنجلد طوالي على بطنو.. الكلام ده يا صاحبي قديم جدا في الهلال.. يعني المعاملة بين مصطفى النقر وكومبا ما ممكن ابدا تكون معاملة واحدة… وكذلك المعاملة بين سمؤال ميرغني ومحمد عبد الرحمن.. هذه سنة الله في خلقه.. حتى موضوع ظلم الكباتن مثلا حاجة قديمة في الهلال ما بدا مع الكاردينال ولم ينته به.. تنقا شطبوهو.. الثعلب شطبوهو.. كومي.. حمد كمال.. محمد حمدان.. وحتى هيثم مصطفى شطبوهو بجرة قلم ، عشان كده عبد اللطيف بوي ده ما ح يكون استثناء عن اخوته في الظلم والتجاهل.. لكن للتاريخ يجب ان نغير من وسائلنا ونحترم عطاء اللاعبين.. نجلس مع بوي ونتناقش وتكون مبررات الترجل مساحة لتطييب الخواطر.. هسه سمؤال ده معظم المشجعين ما بحبو كورتو… لكن اغلبهم ليسوا على حق.. حتى المدرب ده لو قال ما عايز سمؤال ميرغني ما بكون عندو حق.. ما هو ذاتو المدرب الجاب عمر المصري وقال ما عايزو.. وحتى المدرب الهرب داك قال اشطبو فلان وفلان وفلان وبعد ده قال ما راجع.. الخواجات ديل يا صديقي بتاعين مزاجات وغتيتين.. يصفق لنزار حامد في التمارين ويشبكو ليك قووود نزار… برافو نزار وتلقاهو في نفس الوقت كاتب تقرير انو ما عايزو.. حقو نكون منطقيين شوية ونحترم عطاء اللاعبين.. والتبخيس ما حبابو.. ابو عاقلة اتقيم التقييم المناسب.. البخلي سمؤال يتفطس شنو.. نزار بقدم في مستويات كويسة حسب فترة الاعداد وهو افضل من لاعبين تانين ما عندهم عطاء.. ولا مستقبل في الهلال.. لكن مافي زول بجيب سيرتهم لانو عندهم ضهر).
اعود واقول ان ما جاء بعاليه، لا يحتاج مني لتعليق ابعد من إعمال مبدأ المساواة بين اللاعبين بالمنطق وما يرضي الله والضمير، من باب الانتصار لفكرتي، ربما تأخذني العزة بالاثم، غدا، فاتمنى ان تفشل مفاوضات الهلال مع السمؤال لكي نرى (الباك اليمين الفرحانين بيهو ناس موتا وفابيو).. عندها ستدفع لجنة التطبيع ثمنا باهظا.. وسيدرك الاخ العليقي، وقتها، ان مشروع الاحلال والابدال يحتاج لموازنة موضوعية ويحتاج لزمن يخرج فيه الشغيل من الكشوفات خروجا منطقيا وكذلك نزار حامد، والا سندرك نحن، بان الظلم، سيظل عملية مستمرة في الهلال.
اقسم بالله الذي لا اله غيره، استوقفني جاري في الحي، بل قطع امامي الطريق امس قائلا: (احسن تخلو حركاتكم دي وتسيبو سمؤال ميرغني ده يمشي).. لك الله يا سمؤال.. وابشر.. يا هلال ب(الفاس باول).
