النور عادل يكتب : لماذا يكرهون الثورة؟؟ سهير ومزمل والباز وهلما جرا

بنحلم بتعليم مجاني يجي الباص ياخد أطفالك من باب البيت للمدرسة، ويرجعوا الأطفال فرحانين، كل همهم الدروس والامتحانات القادمة ما همهم الرسوم.
كتير نحلم ان أبنائنا يكونوا زي أبناء المسؤولين؟ حرام يكونوا زيهم؟

بنحلم بصحة وعلاج مجاني، تمشي أي مستشفى بطفلك وانت همك يبقى طيب شديد يرجع يلعب ويضحك وينطط ويملأ البيت ضجيج فرح، وينام قرير العين لا محموم لا مبطون لا وجع عيون. ولو تعب نص الليالي أبعد اسعاف منكم يكون 5 دقائق.
بنحلم بدل مستشفى أطفال واحد في العاصمة يكون عشرات المشافي في كل الولايات ويكون علاج الطفل عندنا أولوية ما بتقل أهمية عن الأمن القومي.. وهو شنو الامن القومي لو ما حافظنا على أجيال بكرة ورعيناهم وصناهم.. شنو هو الأمن ده يكون؟!

بنحلم بأمن بحق وحقيقة ما إرهاب وقمع زي الموجود الان ده، تمشي في الشارع مطئن ولما تشوف دورية شرطة يزداد شعورك بالعرفان والامتنان وتدعي ليهم الله يحفظهم مساهرين في أمنك، تقرب تسألهم بقلب قوي من أي حاجة عايزها ما تخاف ينهبوك أو يذلوك أو يشتموك.. تمش مجمع الجمهور تقطع تذكرتك تقعد عزيز في كرسي فوقك التكييف مركزي يهبك لما تبتسم وانت بتابع في شاشة رقمك وفي شاشة تانية أخبار العالم.. وتتقدم بكل ثقة من شباك الخدمة تلقى ضابطا بشوش زين وشيه زي نيل بلدنا من جنوبها لشمالها، يسالمك، يمازحك، يسلمك إجراءك مكتمل.. ولو ناقص يوجهك بأدب تمش وين ومتين وعند منو (شان ما تتعب يا عمنا).. وتمرق وانت بتدعي ليهم خلف الكاونترات شغالين بإخلاص ووفاء وصبر لا وقفوا شان فطور لا تعللوا بوقت صلاة ما جاء حتى وقتها.

بنحلم بخدمة مدنية جادة، تقضي إجراءاتك في زمن وجيز ما ياخد منك يومك كله من مواصلات لشباك لمكتب ولمكتب تاني ولست شاي تقعد عندها شان تغمت ليها رشوة شان الموظف يادوووب يعاين ليك ويبتسم ويقولك (امورك تمام بعد كده).. بنحلم بخدمة مدنية تقنية عالية حاجة كده زي الخليج اللي بز حتى بعض العواصم الأوربية في سرعة الإجراءات، تخيل جواز في 10 دقايق يا مؤمن! ما 10 شهور ومعاها دفع تحت التربيزة كمان.

بنحلم بقانون يطبق على الجميع، مساواة حقيقية أمام القانون، ماف حصانة لقاتل، ماف حماية لفاسد، ماف طريقة حتى لتفسد وتنجو بأي فقه او لولوة، قانون كلمته سيف على الكل، مش نيابة تكاجر قاضي زي البحصل الان ده، مش اعتقال تعسفي بدون أمر قبض.. مش حجز بغرض العرقلة وبس.. قانون نبوي شعاره (لو سرقت فاطمة بنت محمد لقطع محمد يدها) مش قانون باركوها، تحلل.. ودجل ما أنزل الله به من سلطان.

بنحلم بخيرات بلدنا لينا رخيصة ما فاحشة الغلاء، مش لدول الأجانب شبه مجان وبابخس الأثمان، بنحلم مواردنا مرة بس ما تصدر خام ونستفيد منها ونصنعها ونصدرها، نمنع ونوقف التهريب ونضرب بيد القانون على المهربين كل الرتب وكل المقامات، ماف كلام ولا استثناءات للمخالف، ماف مجاملة دي شحنة سيادته فلان وسعادتو فرتكان.

هل تعلم إننا بنحلم وفي ناس زعلانة من حلمنا ده؟ ناس الثورة بتهدد تمتعهم بكل الرفاه العايشاه هي دون الناس.. ناس عايشة حياتها طول وعرض عشان ابوها وزير او رتبة رفيعة.. ناس حياتها عبارة عن كذبة كبيرة من التسلق والتملق والوساطات والمحسوبية.. لا بتقيف صف شان تتوظف لا بتتابع أخبار المنح لا اللوتري.. لأنه كله بتلقاه تحت ارجلها بارد مجان.
عرفتو ليه في صنف كارهة الثورة دي؟ لأنه لو اطبقت جد جد شعاراتها، حرية، سلام، عدالة.
حرية حيلقى البصفهم هو بالشماسة، معاه على قدم المساواة في الحياة العامة كلمتهم قدر كلمته.
عدالة يعني يقيف صف مع اولاد الغبش للتعيين في وظيفة عامة.. يعني ما أبوه سعادة الفريق فلان يضرب تلفون لصاحبه مسؤول التعيين شان يسجل اسم المبروك ولده اللي لسة ما جاء من العطلة وما ممكن طبعا يجي ويقيف في الصف مع الاشكال دي!
عدالة، يعني انت مهما كان وضعك الاجتماعي او الوظيفي في البلد فالقانون يطالك زي غيرك لو خالفت. ماف حصانة يعني ماف حصانة.
حنواصل أحلامنا دي، وكل صباح جديد حنمرق نهتف وننادي بيها، حنسقيها دم ودموع وجروح ومشقة وعنت..ما حنقيف..ولا حنيأس مهما تكالب الظلام واتحد الباطل ما حنخاف ولا بنتراجع.

بنحلم بعدالة
بنحلم بحرية
بنحلم بالاحترام
بنحلم بالوفاء للوطن الأم والأب
بنحلم بعدل العوج
بنحلم بفهم عميق لمعنى حياة كريمة
بنحلم ياخ في حقنا بالحلم والتوق والتمني
لاحظ، نحن بنحلم بوطن بكرة لاطفالنا كلنا بلا فرز، شان عيونهم ما تضوق هزيمة.