النور عادل يكتب : (لا للاشتباك وألف لا)

خلونا نعيد العهد ونكرر الدرس فإن (الذكرى تنفع المؤمنين)
انتصرنا في الأول بالسلمية وحننتصر في الأخير برضو بالسلمية.

عظمة، كشة، د بابكر، د محجوب، مطر، أحمد الخير..الخ ديل كلهم ما كانوا غالبهم ولا تنقصهم الشجاعة للاشتباك!

الاشتباك ما مطلب شعبي ولا ثوري، نجح المخطط بتاع الامنجية في لحظات الغضب واليأس في جر كتير من الثوار للمفهوم الخاطئ ده (اشتبك يا ترس) أبدا ما تطلع من بيتكم لو جاي للاشتباك.. خالص خليك قاعد سالم آمن جنب أهلك لو جايبك الغضب وعاوز تفشو وتشتبك..فهمتني؟!

سلمية؟ أيوة سلمية رغم الدم والظلم والجبروت وسرقة النظاميين نهارا جهارا.. ايوة سلمية رغم قلة أدبهم وهم بشتموك يا خارش يا شكش يا يا.. في اللحظة دي اتذكر أنه البشتمك ده ما سيدنا عمر بن الخطاب ولا البسيء لعرضك دي رابعة العدوية.. ديل كلنا عارفين تربيتهم كيف وليه وعارفين تماما أنهم مغيبين أكتر من الخارشين والساطلين.. الخارش بتفك منه الساطل بفوق بس الكجر مبرمج معقد منفسن تايه ومالاقي نفسه محاصر ما بين جدران التربية الغلط والتعليمات الغلط والقيادة الغلط والقروش الغلط والفهم الغلط..(ظلمات بعضها فوق بعض) ده هو ذاتو بستحق الرحمة.. ما شفتوهم لما بعض الثوار بنضموا معاهم عن الوضع بقيفوا كيفن ممحنين بستمعوا زي الآليين في فيلم (الآلة ) لغاية يجيهم واحد رتبة ينهرهم بنخلعوا ويقوموا ينططوا تاني ويفكوا بمبان في الهواء نظام أداء واجب وكده.

أيوة سلمية يا ترس لأننا لما ننجر للعنف المضاد انت بتشرعن ليهم القتل وتثبت ليهم غسيل المخ حق قياداتهم المؤدلجة وهم أصلا قاعدين على الهبشة.. ما شفت ضباطهم المفترين البقولوا ليك (بستفزونا) ما تستفزوهم ولا بكلمة.. صعبة شديد وحارة.. ايوة لكن الطريق ده كده خليك واثق من النقطة دي.. نحن عاوزنهم يفهموا في روحهم أننا ما اعداءهم، نحن عاوزنهم يفهموا أننا بنناضل لبلد مدني ديمقراطي حر يتساوى في امتيازاته ود اللواء وود حضرة الصول والجندي القاعد قدام باب القسم.. هل تعلم انه المغيبين ديل الجندي فيهم بكون لافي بجناه من مستشفى لمستشفى شان يلقى صورة ما بتوفره ليه مستشفى مؤسسته في حين أنه ود سعادتو ممكن لو جاتو نزلة برد يسفروه مصر للفحوصات! وشوف عيني ما كلموني في ضباط شرفاء ما بتعن ميتات الواحد فيهم بستدين حق الفحوصات لجناه لانه مرتبه ما بكفيه..وفيهم صغار ضباط عايشين أمراء برضو.. فساد فساد فساد.. ماليهو أول ولا اخر.. افهم ديل ما اعدائنا.. ما اعدائنا.. ديل ناس عايشين حياتهم وكنترولهم عند الفوقهم، شان كده #سلمية

حتى الان بعد انقلاب 25 اكتوبر ارتقوا من الشباب نحو 100 شهيد والاف الجرحى والمصابين، الشرطة برضو فقدت شهداءها ضابط وكم جندي وعشرات الجرحى وطبعا عارف ماف مقارنة في العدد بس ياريت لو ما هبشنا منهم نفر لأنه للأسف الشديد قيادتهم بتزايد وبلا منطق باصابات أفرادها، ومقتل ضابطها المريب.. وطبعا هم ساقطين حساب خاصة حصة اكبر من وأصغر من كانوا غايبين.. نحن ما عاوزين تاني شوكة تعتر لهم في مواكب الثورة الجاية بإذن الله وما واقفة ولا انحسرت يا شوكت العنصري.

اهتفوا وانشدوا وصفقوا وسمعوهم صوتكم وخلو مسافة كافية بينكم وبينهم..وارجعوا سالمين وتامين واجبروا جرحاكم وادفنوا شهداءكم وابكوهم لانهم خسارة للبلد وما خسارة على القضية.. انتو مرقتو أحرار لقضية وهم مرقوا مجبورين لتعليمات وشان نثرية! وشتان بين أن تكون حر نفسك وأن تكون عبد الرجال.

قال سيدي رسول الله صلى الله عليه وآله وصحبه وسلم (ليس القوي بالصرع ولكن القوي من يملك نفسه عند الغضب).