مقالات

خليل المرضي يكتب : تتبلوا بس

تتبلوا بس ..

افتكر اننا الآن فقط (مضطرين ) .. لنضع ( ايقونة) القمة علي صدر كل ( المدونات) الاسفيرية والورقية وغيرها …دون ان يرافقها ( هم) اخر ..

اقل من ( 48) ساعة تفصلنا عن اللقاء التاريخي ربما لا تكفي لاعداد الجمهور للمباراة … ولمن يرفع ( حاجب) الدهشة لاقحام لكلمة (الجمهور) في الامر نقول … اكثر من ( 70%) .. من مباراة القمة تلعب خارج اسوار الملعب وميادينه الخضراء …

القمة ( كوره براها) لها خصوصيتها .. و( مخصصاتها) واختصاصيها ..ولو مغالطننا …( العنبة) سيبوها .. اسالوا .. الاسد فوزي .. واستفسروا من .. زاهر مركز في الحصحيصا .. واتحروا من البرنس والكيماوي رغم (الخلف) بينهما

الحقيقة ( المضحكة) تقر. وتقرر في ذات الوقت ان نلاقي المريخ بكشف ( ناقص) عن كشفه ( ابو خمسين) الذي ظل يتلاعب به علي نزاهة المنافسة وحيادية اللوائح و يبرزه في ( مآتم) القوانين واالتي ( تحتضر) مباراة بعد اخرى بعد طعنها عده مرات ( بسكاكين) صدئية ( سنها) له الاتحاد العام وزمرتة الخائنة للعدالة وشرف المهنة .. زمرة ( صابئة) و( منتفخة) و وضيعة .. .ولا تستحق ان تدير داخلية ( البركس! ) ناهيك عن اتحاد رياضي ..
الرسالة باتت واضحة والترصد اضحى مكشوف .. والتامر (علي عينك يا تاجر ) وكان عجبكم .. !

مسلمات ( مصنوعة) يجب الا ننجر خلفها او تشغلنا عن دورنا ومهمتنا علينا ان نتجاوزها و ننسفها ولو ( انيا) ..
علينا ان ننتصر لشرف المنافسة قبل ان ننتصر للهلال … ( 50 ـ 70 – 100) تتبلوا بس …
تحكيم ( تنجيم) شفتنة ..تتبلوا بس … !

علينا ان نثق في قدراتنا والا (نتباين) ونختلف في مقدرات المدرب .. هذه المباراة ليست ( ملكا) لمووتا .. دي كورتنا كلنا .. كلنا لاعبين فيها من يكتب .. ومن يرصد .. ومن يغرد .. من يثير الرعب في المعسكر الاحمر .. ومن يكشف مؤامراتهم .. ومن يصنع الثقة في ارجل وافئدة اللاعبين .. كورااا عندها طقوسا. وليها رجالااا وناسا ..البدلس م معانا ..والبملس ما معانا .. دايرين ناس( وروني العدو .. واقعدوا فراجة .. ) ..كورة شفوت وصعاليق كوره وناس( واقعة) ليهم .. عارفين (الرصة) وحافظين (المنصة) ..
كورة ضغط واستخلاص وثقة بالنفس و(خلاص) وشبكة بس .. دي زي كورة ( زيكو) كان ما جريتوا ما بنخليكم ..! الا بالمناسبة ( الكورة الشالا ابوالزيك رجعا ولا لسسسسسسة … ! )
شايف يا ابوعشرين ….. الهلال دا فيهو ( رجال) يخلوك تقنع منها وتحلف ما تمها وبلا ( خجلة) تبقى مااارق اتا وكورتك …! سامعني يا غربال .? فاهمني يا سوباط … ! …

هزيمة المريخ ودحر وتعرية الاتحاد ( المنحاز) مسؤليتنا كلنا … الشغلة ما بقت كورة. .. بقت التفاف ومؤاربة وتأمر علي العدالة والقيم بقت ( ماي ياها) …! ونحنا ناس وطن. .. وثورة .. وتربية. … و( السيستم ما بحلك. .. السبت دا يوم بلك) …

وعشان ما ننسي المباراة ايضا تحتاج ل اداريين من الطراز الفريد .. سنضع كامل ثقتنا فيكم لتحقيق انتصار اداري جديد علي ناس التواطؤ والتحكيم و(الخزعبلات ) ديل .. !

دقت ساعة (الجد) ولا صوت يعلو فوق صوت المعركة .. معركة الانتصار للحق والحقيقة .. ونحن لها ..
ابقوا الصمود .. وثقوا في هلال الملايين رائد التغير … و (سيد البلد ) .. والسيستم ما بحلك ... بتجينا وبنبلك .. !

خارج النص ..
تقبل الله شهداء الصحراء ابناء عمومتي وقريتي ( البخيت) الذين وافتهم المنية وهم يسارعون الخطي لحياة الكرامة والعزة … ولله في خلقه شئون .. والله غالب علي امره … لهم الرحمة والمغفرة والقبول …. خليل المرضي .. ابوالريش درويش هلالي ...

مقالات ذات صلة

زر الذهاب إلى الأعلى