متوكل الدسوقي يكتب : مداخل

● مدخل اول :
يا هذه البنت التي تمتد في دنيايا سهلا
وربوعا وبقاع
ما الذي قد صب
في عينيك
شيئا من ترجيديا ( الصراع )

● مدخل ثاني :
( الصراع ) الشايفنو دة اخراج طبيعي لمدخل غير طبيعي .

● مدخل ثالث :
بعد لبنت ادوها الطير

● مدخل رابع :
الطيور تتغير اشكالها في بعض الأحيان على شكل ( برمائيات ) تعيش في الوحل ولا ترضى العيش في سكون ولا ترضى العيش في بيئة صحية .

● مدخل حزين :
طير يا طير الخلا
جيبوا لي اخبار ورا
قليبي الدمروا
دمروا العرب الورا

● مدخل خاص :
ونتساءل منو الخاسر
منو الربحان
منو الكاتل …
منو المقتول

● مدخل أفقي:
الريس عامل غمران وسادي دي بي طينة ودي بي عجينة … طباخ الريس فرحان واخو الريس خمجان وصانع الشر يتلقى الاخبار وينشر في الغسيل الوسخان.

● مدخل السيطرة :
كانوا تلاتة…
ود النوق ..
و (ديك ) و ( عتيت )..

● مدخل حزين :
( العتيت ) تصغير ( عتوت ) او ( عتود ) شم ريحة صناحو وافتكر انو بقى ( تيس ) كامل الصناح والفحولة معتمد على طول رقبة ود النوق وصياح ( الديك ) .. فكشر عن ( صوفه ) و ( لبلب ) مبكرا وأراد ان يحكم الغابة تاركا وراءه باب ( الحور ) مفتوح فتبعته الاغنام بالصياح والتشجيع ..
وهو لا يعرف انه لا يصلح الا ان يكون طباخا للريس وظيفته الأساسية جمع السادة حول الموائد ..

● مزمار نص :
بتتغير بتتغير بتتغير
وزي ما انت نحن كمان بتتغير
وزي ما عيونك الحلوين بتتغير . ..
وتتحير …

● مدخل وهمي :
الزول الماسك الريموت غير ( حجار ) البطارية ..
الإشارة غير واضحة

● مدخل امل :
بالرغم من كل السخف يظل الأمل قائما في الذهاب بعيدا …

● مخرج آمن :
كل ما الريح تطارد الموج
ازيد اصرار واحلف بيك
اغير سكة التيار
واقول يا انتي ..
يا أغرق

● مزمار وداع :

جرحنا عتابك يا قاسية
عايزانا نغني الأفراح
ما الغنوة الناشفة لبن ضرعك
والفرح الفيك خلانا وراح
خلينا من الفرح الزايف
بتعود افراحنا وتلقى براح