خليل المرضي يكتب : تغريدة الريس..

▪️ ساكون مضطرا لتفنيد وتحليل التغريدة التي بعث بها رئيس النادي (المهاجر) هشام السوباط.. آناء الليل..

▪️ والاضطرار هنا مبعثه سببان.. اولهما…
ان التوقيت غير مناسب (للاثارة) كما يقول الكثيرون من الاهله وثانيهما.. ان الامر لم يكن يستدعي تداخل الرئيس فالقضية بين ايادي اللجان العدلية التي كونها بنفسه والنشر في هذا التوقيت بالذات قد يضر بها او يضار منه الهلال …

▪️المهم

▪️ قال الريس.. (اتابع باهتمام شديد ولا اقول بقلق، ردود الافعال المشفقة علي وحدة تماسكنا كمجلس ادارة وذلك حيال الشكوى التي تقدم بها بعض اعضاء جمعيتنا العموَمية قدحا وذما في ممارستنا العمل الاداري)

▪️ التعليق..

اول حاجة يا ريس … الهلال لا يدار ب (التغريدات)والرسائل.. والتجربة (الدنماركية) اقصد المريخية تكفى لشرح خطورة الامر.. ومآلاته (حَمانا الله)
و بصراحة كده ماقدرتا افهم (الاهتمام الشديد) القولتوا دا ناتج من شنو المشفقك شنو… فالشكوى في (جوهرها) تطالب بفحص ومراجعة الاداء المالي والاداري..وبس ودي حاجة عادية ومشروعة وطبيعية طبعا.. ومنطلقة من (دستور) اجازتة جمعيتكم العمومية.
التماسك هنا دخلوا شنو و (الفكفكم) من بعض منو والوحدة البرفتقا شنو..
معقولة (دعوى واحدة تفرتق زينتكم) اتو (هشين) للدرجة دي.. كلام غريب

ولا (الشكاوى) و(الطعون) فيكم ممنوعة، فهمونا ياعااالم… الدنيا دي قايمة كده في شنو

اتو موش، قبل كده قدمتوا (التماس) للجنة الاستئنافات العامة ومشيتوا قراركم االدايرنوا في رسوم العضوية .. برغم انو مرفوض ومجحف في حق الاغلبية (المغلوبة علي امرها) ليه م قلنا ليكم انو القرار دا… ذم وقدح وتعدى وتجاوز وو العبارات (المؤذية) دي..

الذماكم منو
كل مافي الموضوع (اتنين) من الجمعية قالوا انو في مخالفة للمادة (45) من النظام الاساسي.. ولو قالوا حاجة غير كده… ورونا

ومتين كانت الممارسة الديمقراطية منقصة وذما كما ذكرت…

دا مع ملاحظة ان الشكوي حتي الان عادلة ومستوفية لكل شروط التقاضي والفصل والدليل الاستدعاءات التي طالت اطراف القضية فلولا وجود حيثيات حقيقية لقتلت القضية في مهدها ولآكتفت لجنة الاخلاقيات باستدعاء (المدير العام والامين العام) البروف والدكتور…وإصدار القرار

(والعود لو ما فيهو شق ما بقول طق)
الجقلبة فوق كم وليه العبارات الحاده دي والتشكك في نوايا (الشاكيان) والاصتفاف وعدم الوقوف علي مسافة واحده من كل اطراف القضية….

واتا كبيرنا ورئيسنا وحادي تغيرنا.. وجهدك و(بذلك) المتفاني للفريق يجد التقدير من الجميع.. ياخ ممكن ناس (عيسى واللسيد) ديل حريصين عليك وعلي قروشك.. ليه ما فكرتا ف (الحتة) دي..

▪️ يسترسل السوباط فيحدثنا في تغريداتة..
(عن ان الشكوى لاتخص زيدا او عبيدا تخص مجلس الادارة باكمله ويقول صحيح انها تزعجنا وتكاد تحطم مقاديق قدرتنا علي احتمال هذا السلوك الذي يخدش هلاليتنا)

▪️ التعليق..

مع (احترامنا) ليك
دا كلام عاطفي و(سيرالي) ساي وما عندو علاقة بالواقع والقصد منه تزيف الحقائق وتهويل الامر .. االشكوى موجهة نحو شخوص بعينهم فكيف بتخصكم كلكم…

الموقف دا طبعا ذكرني زمان لمن كنا شفع.. لو في زول في حله تانية او(حلال تاني) شاكل زول من حلتنا او قول اختلف معاهو سااي بنتلمأ كلنا عشان نشاكل ناس (الفريق) التاني.. والحكاية (تنبشق) ياخ معقولة.. دا اسمو كلام..!

قانونيا اتا ما عندك علاقة بالامر لانك اصلا بتدير الهلال (بالوكالة) وما متابع تفاصيل كتيرة
اما عاطفيا دي انا ما بعرفا..؟

كدي وريني الشكوى دي بتزعجك كيف.. وبتحطم مقاديفكم ليه والبخليكم شنو ما تحتملوا هذا السلوك… والسلوك شنو الما قادرين تحتملوا هم (الشاكيان) ديل (شكيتم لي الله) ههه عملوا شنو و(سلوكم) مالو ياخ وخدشوا هلالية المجلس كيييف

انا ماعارف الممارسه الديمقراطية والعدلية وحماية مكتسبات الهلال واولها (النظام الاساسي) قعد (تحرق) ناس كتار ليه… حيرتونا…

▪️ وتستمر التغريدة
(ولكننا بكل الصبر واحترام الاراء المخالفة يجب ان ننظر للجانب الايجابي الذي يعطي مجلسنا (صك) البراءة بعدم تدخله في اللجان العدلية او التأثير عليها. بدليل ان احدى هذه اللجان تضع مجلسنا كله الان علي المحك الصعب، في ابهى صورة من صور الممارسة الديمقراطية الراشدة والتي تجمل مسيرتنا كمجلس اكثر مما تشوهها لذلك لن نبدئ اي انزعاج للشكوى طالما اننا في المسار السليم)

▪️ التعليق..

الله عليك يا ريس روووعة وابداع.. اصلا مفروض (التغريدة) كلها تمضي علي هذا المنوال.. كلام مسؤل ومنهجي ، كلام رؤساء بحق وحقيقة… كويس مالك من الاول وليه (التناقض) المالبيهو الخطاب دا… بالجد الفقرة دي عجبتني..

فقرة تجلى فيها (الريس) ونظر فيها للامر ب (منظار) المؤسسية و(الحياد)..

▪️ ويختم رئيس مجلس ادارة نادي الهلال بتغريدته..
(ونثق تمام الثقة في كل من شملتهم الشكوى، بانهم الاحرص علي حقوق الهلال، والاشرس في الدفاع والزود عن حياضه، وهذا ما ستثبته الايام القليلة القادمة)…

▪️ التعليق…

كلام دبلوماسى وهادي ورزين ويتوافق مع (حتميات) منصبك كرئيس للهلال.. فحتي المتهم يظل برئيا حتى يثبت العكس

مع انو (الخماسي) ديل ما متهمين ديل (يلتبس) في مخالفتهم النظام الاساسي وبس ما تحملوا الموضوع اكبر من حجموا.. فالموضوع ما خطير….

▪️ اخر المطاف..

كنت اتمنى ان يستنكر السوباط التهديد والوعيد والتشكيك والذي اصدره البعض علي صحيفة (الزرقاء) علي ما اظن..

فالفتنة نائمة لعن الله من ايقظها… والكلام القالوا دا شين في حق الهلال وحق الناس القالوهو و(روجوا) ليهو…. ولا الحكاية سائبة والهلال دا بقى حق ناس محددين..
ممكن يطردوك منو زي الما حصل شئ..

▪️ نقطة.. سطر اخير…

لولا تغريدة الريس لما (خضت) في الامر..
وقلوبنا ودعواتنا وامنياتنا دوما ان يعبر الهلال فرقة (اليانق) التنزاني كما جرت العادة وتقول الطبيعة..

▪️ اخيرا
(نحنا اذا اختلفنا سوا بنطيع الصاح)