عبد اللطيف ضفاري يكتب : رحلتي من الدك إلى الخمسين..!!

و.. بلادنا اصبحت (كوتشينية) بحتة في كل مناحي حياتنا، ففي النزوح اصبحت توقيت زماني ومكاني، فالفطور بعد العشرتين الاوائل، وبلاقيك في محل الكوتشينة، وقررت ان اكتب كتابا بعد ان انال درجة الدكتوراة في الحريق؛ وقد اخذت الاسم من حلقات الدكتور مصطفى محمود (رحلتي من الشك الى اليقين)؛ حيث سيحمل كتابي اسم رحلتي من (الدك الى الخمسين)، وذلك بعد ان رفعت ورقي ووجدته (كل فردة من بلد)؛ فصرخت (دك) فإذا بجاري يرد بـ(حك) يتبعه بـ(بل بل بل بس) منهيا لاخر امل في التخلص من هذا الورق البائس، ولكن كان الصندوق اكرم فاعطاني (اوراق) اعتماد في العشرة الجاية، وانني ساحافظ ولن احرق، حتى وجدت نفسي صارخا (خمسين) في ذات الجار الذي قال لي (حك) في بداية اللعب، الحياة الكوتشينية التي نعيشها يعيشها غيرنا بطريقة مختلفة، فجيش الكيزان واضح من حجم الـ(خمسينات) الاتجراها انو كان لاعب لي دكها من البداية، (دك) كبري شمبات؛ وكبري جبل اولياء دليل على (كعوبية) ورقو، وكل يوم والتاني (شايب) الجيش لافي من (تربيزة) كينيا، لي تربيزة اثيوبيا، ما خلا ليهو تربيزة ما فتش فيها عن (جوكر) يساعدو على (الفتوح) والتخلص من (آس) الكيزان عشان ما (يتمسك) بيهو (هبابة)!!

دُراب
*الدعم السريع ما بلعب الـ(حريق) من دون ما تكون (مطعمة) ببيوت مواطنين!!
*نزول الدعامة واقف في حدود (56) والجيش قافل على (تريس كينيا) ميت!!
*النازحين منتظرين الـ(عشرة) الجاية بعد ما حرقوا من يوم 15/ ابريل!!
*اعلى (اسكور) لحدي الآن مسجل بي اسم عمر البشير (وزع غلط)؛ واتقبض (تلاتة هبابات)؛ واتجر عشرة خمسينات!!
*(اكيش) اتنين في عشرة حريق الجيش والدعم السريع هما انس عمر ومحمد علي الجزولي (اتقبضو) هبابات قبل ما (يجروا) من الصندوق!!
*(دامة الديناري) عايشة الماجدي ودامة الشيريا رشان محتاجين دامة (هارت) عشان يتم الكباشي الـ(نزوح)!!
*اكبر جلا في تربيزة حريق الجيش وابنو هو (دو) الانصرافي، و(اربعة) غسان القداني؛ وتريس نادر العبيد، والعسكري مين كدا المصطفى وذنون لو لميتهم كلهم ما بتموا (واحد وخمسين) النزول!!
*حسن طرحة منتظرا تدكا عشان يمكن يوزعوه كـ(تسعة) تعمل (تخميسة) لسجارة برنجي؛ في وزارة الـ(تتخين) ضار بالصحة!!
*إبراهيم الميرغني ومبارك اردول يشكلان اكبر (تعريجة) في حريق الجيش وابنو!!
*المقال دا بهديه لكل الرجال الماتو في كرري بمناسبة يوم الرجل العالمي، وحابي اقول ليك انتو كـ(نار) وشرار الرماد دا جبتو من وين!!
*الاسبوع المقبل ح ابدأ اولى صفحات كتاب الـ(سيك) بدربو، بعد ان اصبحت من جهابزة الويست فيك يا جزيرة!!

روّاب
عبدالحي يوسف في عشرة حريق الجيش وابنه هو (آسـ)ـتغفر الله العظيم!!