الشاعر الكبير أزهري محمد علي : ها نحن نرد علي الازالة بالاطالة

كتب الشاعر الكبير أزهري محمد علي

كبروها

ذات صباح من صباحات الله بخيرها رن هاتفي  .لمع إسم المتصل في الطرف الآخر.محجوب شريف بعد التحيات والسلامات .دار الحوار التالي ..في البيت ولا طلعت ؟
اجبت في البيت وطالع الان .
طيب اغشاني عايزك في موضوع..
اجبته حاااضر
وصلت منزل محجوب وجدته في التعريشة الخارجية والتي تطل علي الميدان وكانت قد اتسعت مساحتها منذ أن رايتها اخر مرة .
بعد السلامات والمحبات قلت له انت التعريشة دي مش ناس المحلية قالوا ليك شيلها ؟ اجاب دعك منهم ردينا علي قرار الإزالة بالإطالة..طيب بنجي لقدام نوضح ليه جبنا سيرة التعريشة ..وسأكمل موضوع استدعاء محجوب الصباحي لي بغرض التذكير بدور المثقف العضوي والفاعل المنفعل بقضايا شعبه .كانت التعريشة والحوش الداخلي مليانة بي وجبات غذائية مغلفة قلت لي محجوب ده شنو؟؟ قال لي ده الغرض من جيتك .واضاف الوجبات دي مفروض تصل لي مكانين مي وصاحباتها ح يوصلوا جزء لي الأطفال مرضي الدم بمستشفى البلك .وانت ومريم ح توصلوا الجزء التاني لي مستشفى الخرطوم عنبر  ( ابو )حيث مرضيّ الناسور البولي وانت ما مطلوب منك التوصيل بس مطلوب منك تلاقي الأطباء المسؤولين منهم وتستمع لي مشاكلهم وتشوف ممكن بي علاقاتك تساعد بي شنو. وصلنا العنبر مشت مريم وزعت الوجبات علي النساء في العنبر وجلست انا مع الطبيب المسؤول عنهم استمع لسردية مؤلمة حد البكاء ترجع جل اسبابها لثقافة وعادات سادت تمثلت في الختان وزواج القاصرات وغيره من العادات ..ذهب الطبيب الي ان بعض المرضى ظللنا هنا لسنوات حتي تخلت عنهم اسرهم وان الاعداد تتزايد والإمكانات تتناقص مما اطرهم لإيجار منازل ببعض الاحياء وترحيلهن ..ياتري في زول هسي من دعاة الحرب بيعرف الحصل عليهن شنو؟ الله المستعان ..نرجع لي موضوع الازالة والاطالة بعد ان فشلت مجاميع الغرف والمنصات والصفحات في تحرير المدن والقري وتخليصها من تعديات مليشيا استولدوها من رحمهم وارضعوها من ثدي الدولة والهوها كصنم العجوة يعبدونه عند الخشوع ويلتهمونه  عند الجوع ،
ذهبت متحركات الكرامة والفحولة لتحرير القصيدة من الركاكة زحفا علي جسر الشنب ..وها نحن نرد علي الازالة بالاطالة فالقصيدة الركيكة كبروها فاصبحت اغنية تاأتي محمولة علي صوت الفنان الجميل ابوبكر سيد احمد
وأغني لشعبي
ومين يمنعني
اغني لقلبي
اذا لوعني


والحرب لازم تقيف ‏