كمال الهدي يكتب : عليقي يا زول المدرجات
. انتو العليقي ده مش يا هو زول المدرجات والهلالابي المعروف لرفاقه في المساطب!
. ومش انتو أصحاب وجعة كجمهور لهذا الهلال الكبير والمفروض لما تدعموا واحد منكم أن يظل هذا الواحد محل ثقتكم وأن تسألوه عندما يحيد عن جادة الصواب!
. ولا القصة كدح وتعب واجتهاد مؤقت من أجل الهلال وبمجرد أن يجد الواحد منا فرصته للصعود عالياً ينسى سريعاً قصة كونه زول مدرجات!
. ولو الواحد فينا نسى إنتو بتتناسوا معاه ليه!
. كل الكلام الدارجي الفوق ده سببه دعوة العليقي لجماهير الهلال بدعم مشروع ( أنا هلالابي) القال انه بيخلص الأندية من جيوب الأفراد.
. يبدو لي العليقي شعر بأنه خلاص وصل وعشان كده داير يستثمر في اسمه بعد ما وجد من الرافعات الكثير (أقلام وجماهير تعودت على سواقة الخلا) .
. لما دايرين تخلصوا الهلال من جيوب الأفراد (خجيتوا) الانتخابات ليه يا عليقي، وحتى المرشحين المستقلين استملتوا بعضهم للاستثمار في أسمائهم!
. وكت دايرين هلال يعتمد على جماهيره ليه ما ركزتوا على ملف العضوية ووعيتوا الجماهير دي!
. وليه ما فتحتوا أبواب العضوية على مصاريعها داخل العاصمة وفي الولايات وبالخارج!!
. وليه ما التزمتوا بكلامكم (الساي) عن تحويل النادي لشركة مساهمة عامة!!
. وليه ما اعتمدتوا الشفافية نهجاً..!!
. ولا هو كلام والسلام.!!
. ياخي انتو ساكتين عن ملف الإضاءة من سنين ومافي مشجع عارف الحاصل فيه شنو وبرضو دايرين الناس تدفع لمجلس لا عنده حسابات ولا مراجعات ولا ميزانيات واضحة!!
. كلامك ده بذكرني وجع (جنيه حمدوك)، شغل عواطف و(تدقيس) للناس.
. فوقتها ونظراً لعاطفتنا الدفاقة كسودانيين بدلاً من أن ننتظر من حكومة حمدوك وضع الأسس السليمة للإنتاج في بلد تغمره الموارد والثروات وقبل أن نضمن وجود نظم محاسبية وضوابط تحكم تدفق الأموال دُشنت حملة ( جنيه حمدوك) التي وجدت فيها شغل عاطفي لا بودي ولا بجيب.
. والحقيقة أنه لا ودى ولا جاب، ولا عرفنا الأموال ديك مشت وين.
. ونفس الشيء ينطبق على مشروعكم، فالهلال غني بموارده البشرية ولو أردتم دعم الجماهير الحقيقي والجاد لكانت العضوية مدخلكم.
. فلا تضحكوا على البسطاء بمثل هذه البرامج والعبارات الرنانة.
. ما أكتبه ليس تشكيكاً لا في العليقي ولا في دكتور حمدوك، لكنها مطالبة بالمؤسسية والشفافية باعتبارهما أساس أي نقلة منشودة.
. فلا السودان ولا الهلال بحاجة ( لمد القرعة) بهذا الشكل المهين.
. يفترض أن تساهم جماهير الهلال في تعزيز موارد ناديها نعم، لكن لابد أن يتم ذلك بالدرب العديل (العضوية) لا عبر هذه البرامج والمشاريع الوهمية.
. ولو كان الهدف أصلاً تخليص الهلال من جيوب الأفراد لبدأتم فترتكم بالصورة الصحيحة.
لكن الواقع غير ذلك تماماً، فما أن استقطبك السوباط لمجموعته لكونه ( ما زول كورة) وأنت ابن المدرجات المعروف لعدد من جماهير النادي رأيناكم تلجأون لتسجيلات (الكوتة) والهدف هنا واضح وجلي وهو دغدغة عواطف الجماهير وتسليط الضوء على القدرة المالية لعلمكم بأن الناس في بلدي صاروا يميلون لمن يملك المال.
. إذاً قبلت بكم جماهير الهلال باعتباركم أثرياء مال لا أفكار وخطط واستراتيجيات.
. فإما أن توظفوا هذه الأموال بالصورة الصحيحة إن أردتم ترك بصمة أو تلتزموا بالمؤسسية والشفافية لو (كتر عليكم الصرف) ورغبتم في دعم الجماهير.
. أما أن تدفع جماهير الهلال أموالاً لا تعرف أوجه صرفها فهذا ما لا يقبله عقل ولا منطق.
. وخليكم من (الحاجات الصورية) البتعملوا فيها دي.
. فمثل إعلان أمينكم العام عن جائزة للموظف المثالي تضحكني جداً.
. فليس متوقعاً وجود موظف مثالي ضمن بيئة نادٍ يحمل أمينه العام مؤهلاً عالياً لكنه بدلاً من توظيف هذه المؤهلات والخبرات المتراكمة لتغيير الواقع البائس نجده يساير الموجة ويقبل بالعمل تحت من لا يملكون ولا 10٪ من مؤهلاته وخبراته.
. لا أتوقع وجود موظف مثالي في بيئة نادٍ يرى أمينه العام أن اللجان العدلية ولجنة الأخلاقيات لابد أن تكون تحت إمرة المجلس، إلا إذا كانت المثالية تعني عندكم الطاعة العمياء لأصحاب النفوذ.
. ده كلام ناس بتنشد المثالية بالله عليكم!!
. رجاءً ما تزيدوا أوجاعنا، و(مشوا أموركم) إلى أن يقضي الله أمراً كان مفعولا، بس بدون تنظير.
